SI KONSENTRA prinsipalmente riba gobernashon, e periodo 10-10-2010 pa 30-9-2012 ta un di e temporadanan mas negativo den nos historia. Sumamente negativo i ta di spera ku nunka mas nos lo no konfrontá ku situashonnan asina. Nos pais Kòrsou durante e periodo ei tabata totalmente paralisá i den gara total di puru rabia, odio i agresividat. Lógikamente ku krímen ta bai man den man ku e tipo di ambiente ariba menshoná.

Tin personanan na Kòrsou ku ta insistí ku tur esaki tin di haber ku influensia di e demoño ku a penetrá i establesé den relashonnan familiar, na boka di trabou, entre amigu, kontra di periodistanan krítiko, kontra korant i radio-emisoranan ku no ta soportá soketada, kontra direktornan di e empresanan di gobièrnu.

Ademas e demoño enkarná den kurpa di hende, abiertamente a deklará guera kontra di Iglesia Katóliko. Pastornan i te hasta monseñor a eksperenshá konfrontamentu ku e demoño.

Derochamentu di plaka di pueblo na gran eskala ku biahamentu, sakiámentu di e pertenensia di e pueblo a la estilo di zamuru riba empresanan di gobièrnu.

Nos tabata riba e ruta di bira un pais brutu, vulgar i sin kompashon ku hende, pa bai kaba den e abismo di malisia i mizeria.

Ekonomia di Kòrsou ta totalmente paralisá, no tin ni sikiera un proyekto (real) ku ta duna speransa pa futuro, solamente gritunan di malkontentu i desesperashon. Konflikto práktikamente rònt Kòrsou!

Sinembargo, pendiente di resultado di e elekshon programá pa dia 19 di òktober binidero, tin un kambio temporal, awor ku a instalá un gobièrnu interino. E gobièrnu interino, dirigí pa mr. Stanley Betrian, huntu ku dr. Jose Jardim, Stanley Bodok MBA i drs. ing. Chucho Smits, entrante 30 di sèptèmber a haña kaminda liber pa trese kambionan nesesario i positivo.

Esaki ke men ku ta momentu pa pone un fin tras di e kultura di selva ku tabata menasá i ku rápidamente tabata tumando Kòrsou kompletamente over. Gobièrnu interino por habri un kapítulo nobo, restablesé òrdu i trankilidat, introdusí reglanan di desensia bèk i habri e kaminda pa pas reina den Kòrsou, siguiendo riba e kaminda di adelanto i prosperidat. Ta basta ku kanibalismo, humiashon i opreshon di e propio suidadano kurasoleño.

Ounke den un tempu bastante kòrtiku e gobièrnu nobo por hasi un bon trabou, mustrando bon boluntat, pone e base di konfiansa i rèspèt den pueblo, enfokando riba balor di famia, bario i trabou, stòp e proyektonan maligno i korupto ku tin den preparashon, koba den e berpùt i trese klaridat pa salba nos isla for di mas sufrimentu.

Pero, yunan di Kòrsou i demas suidadanonan di e isla aki mester bira konsiente ku nos por traha ku otro, kombiná kapasidat, talento i konosementu pa krea adelanto i sufisiente prosperidat pa e isla aki.

Mara yunan di Kòrsou di tur parti di mundu por djòin awor i kontribuí pa alsa Kòrsou, pon’é bèk na un nivel di desensia aseptabel!

Orashon ku fervor na Dios Tata Todopoderoso ta nesesario pa gradisié pa su bondat i mizerikòrdia ku nos, pidié yudansa i bendishon pa nos pais Kòrsou.

ERWIN RAPHAELA

Curaçao