LOKE A pasa último luna riba tereno di polítika ta algu natural ku ta pasa den un proseso demokrátiko. Demokrasia ta un proseso di korekshon kontinuo, un proseso pa yega na perfekshon. E perfekshonamentu tin di sòru ku al final tin un pais pa ‘Un i tur pa uni tur’, huntu ku progreso i bienestar pa tur hende.

Den e proseso di perfekshon demokrátiko ei kada bes e siudadano ta haña e sentimentu ku e tin mihó kòntròl riba su destino huntu ku su gobièrnu ku e ta kontrolá via su parlamentu. Semper e individuo mester sinti ku e tin kòntròl riba su gobernashon.

E momentu ku gobièrnu alehá su mes di e pueblo ta bin intrankilidat den e pueblo. Na e momentu aki nos ta den un periodo asina i nos tin di – via diálogo ‘den parlamentu’ – trese trankilidat bèk den e sosiedat.

Dia 19 di òktober e pueblo por ehersé su poder máksimo elihiendo un parlamentu nobo ku riba su bùrt tin di pone un raad di minister i staatssecretaris ku kapasidat pa uni e pueblo bèk i duna speransa ku e por saka e sosiedat for di e pos ku nos ta aden aworakí. Un situashon hopi serio, kaminda lo tin di hasi sakrifisio serio. I pa bo por logra esaki bo mester tin lidernan íntegro ku e pueblo ta kere den nan komo hende i den nan kapasidat.

Asina e pueblo no ta mira nada mas den e ‘team’ di minister, e parlamentu mester hasi su trabou di korekshon (na nòmber di e pueblo).

Si e parlamentu no por yega na un entendimentu ku e gobièrnu:

• e gobièrnu tin di baha pa ‘reshufle’ ku respaldo di e mesun koalishon den parlamentu òf

• forma un otro gobièrnu nobo ku sosten di un otro koalishon.

• Si esaki no ta posibel, no tin manera di hasi ku ta kanta elekshon nobo.

Den e término demisionario e parlamentu por

• ‘gedoog’ esun ku no tin konfiansa mas di mayoria di parlamentu òf

• si un mayoria ta haña ku tin di pone otro ministernan den e periodo interim, manera a sosodé e siman ku a pasa, ‘so be it’.

Ta esei ta demokrasia.

Semper e parlamento tin e último palabra. TUR ORA.

Naturalmente nos tin di suponé ku un parlamentu (di kualke mayoria) ta di buena fe pa ku e pueblo.

RUBEN SURIEL

Curaçao