KUMINSAMENTU DI e siman akí a drenta e notisia tristu ku sr. Eddie Pieters Heyliger a bai sosegá. Pa un tempu relativamente largu, Eddie tabata sufri di kebrante di salú, sinembargo por a not’é na vários okashon, te un shete luna pasá asina, ta kombersá ku su amigu i konosínan na lugánan públiko, miéntras nos tabata bishit’é tambe ku sierto regularidat.

Su nòmber ofisial ta Edward Milburn Pieters. Eddie Pieters a nase na Saba, 22 di ougùstùs di aña 1927. Komo honor na su mama e tabata usa e nòmber Eddie Pieters Heyliger komo su nòmber artístiko.

For di mucha Eddie tabatin amor pa literatura, miéntras e tabata gusta lesa.

Mundu kultural di Kòrsou a sera konosí ku Eddie Pieters Heyliger 26 di yüli, dia di Kòrsou, aña 1955. Riba e fecha ei, Eddie, na edat di 28 aña a debutá ku e grupo di komedia ‘Maskarada’, ku algun skèch ku el a skirbi. Na 1957 el a tradusí pa promé biaha un komedia. Ta trata akí di e komedia franses titulá ‘L’Ecole de Femme’ di e outor Molière.

Na 1959 el a presentá e komedia akí den teatro Roxy. Despues di e tradukshon akí a sigui mas tradukshon. Mayoria di obra di teatro ku Eddie Pieters Heyliger a presentá tabata obra tradusí. Banda di obra tradusí pues, Eddie tabatin tambe obra original.

Ehèmpel di un obra original di Eddie ta e obra titulá ‘Ta ken ta manda’. Ta trata akí di un obra kómiko. Por sierto e obra en kestion tabata e obra ganadó durante un konkurso ku CCC (Cultureel Centrum Curaçao) a tene na aña 1959.

Ademas di obra ku el a presentá den teatronan di Kòrsou, entre otro Roxy i Centro Pro Arte, Eddie Pieters Heyliger a skirbi obra spesialmente pa radio i televishon. Eddie ta bai den historia komo e promé artista ku a presentá un komedia den e teatro di Aruba ‘Kas di Kultura’. Durante tal okashon el a presentá e obra ‘Abo no ta peligroso’. Ehèmpel di un obra di dje, skirbí spesialmente pa televishon ta e obra ‘E dia ku niño Hesus a spanta’.

Masha konosí ta e obranan di dje, skirbí spesialmente pa radio bou di ouspisio di Famia Planiá. ‘Kasamentu fòrsá’ i ‘Mi ta stimabo, mi yu’ ta dos ehèmpel den e kuadro akí.

Eddie ta tambe outor di diferente kuenta kòrtiku, manera por ehèmpel e kuenta kòrtiku ‘Despedida di un sonrisa’.

Banda di a skirbi obra ku ta pertenesé na e género di drama i e género di prosa, Eddie a skirbi vários poema. Ehèmpel di dos poema ku Eddie a skirbi ta ‘Kontra–Punta’ na 1978 i ‘Soneto pa un yu’ na 1981.

Pa mayoria di hende Eddie ta konosí komo produktor i presentadó di e programa radial kultural ‘Echa Palabra’. E programa a dura sin interupshon di aña 1971 pa aña 2000. Na algun okashon nos a remplasá Eddie Pieters Heyliger durante su ousensia, pa loke ta presentashon i redakshon di e programa ‘Echa Palabra’.

Apesar di tabata mas konosí riba tereno literario kultural, Eddie tabata un figura konosí tambe riba tereno di deporte, miéntras e no tabata un deskonosí den arena polítiko.

Na aña 2008 Eddie Pieters Heyliger a haña e distinshon ‘Premio Bienal Pierre Lauffer’ (Chapi plata).

Mundu kultural a pèrdè un gran pèrsona. Manera Bo sa bisa semper ora hende muri: ‘el a bai nos dilanti’, awe mi ta bisa Bo: ‘Bo a bai nos dilanti’.

Eddie, sosegá na pas.

ARTHUR L. TJIN-KON-FAT

Curaçao