DJASABRA MAINTA 20 di òktober, manisé di elekshon, komunidat di Kòrsou por mira atras riba kiko el a disidí porfin. Nos ta bai sa kiko di bèrdat tabata e eskoho di e pueblo aki. Nos ta bai sa kua ta e partidonan polítiko ku tin e posibilidat di forma e gobièrnu nobo. Tur esaki netamente den un periodo ku Kòrsou mester di un kambio drástiko. Pa kuminsá nos mester yega na pas i trankilidat, rèspèt den gobernashon, den famia, na skol, trabou i den nos barionan. Ta basta ku kriminalidat i maltrato di nos hende grandinan! Nos ta bai establesé e regla ku ta trata hende muhé ku amor i kariño atrobe? Lo stòp e komportashon grosero kontra otro i ban atendé tur suidadano di e isla aki ku rèspèt?

Sòru pa keda bon ku famia. Ni maske kiko sosodé, no laga polítika daña nos relashonnan.

Rumannan, e situashon di Kòrsou mas ku nunka ta pidi pa ban sera kabes pa traha na adelanto den pueblo, kita pobresa i problemanan kousá pa antagonismo.

P’esei no ta rekomendabel vota a base di rabia ni desgustu òf gana di tuma vengansa. Pone un banda tur bo fanatismo i emoshon eksagerá.

Konsentrá ku nos pueblo lo vota e biaha aki pa pone su mihó hendenan den funshon, legumai aparensia, esta koló, kabei òf rikesa.

Kòrsou mester di suidadanonan responsabel i ku animo haltu pa hasi Kòrsou progresá.

Tin tur indikashon ku e gobièrnu nobo lo hañ’é ku un situashon finansiero fastioso, kaótiko i doloroso, pasobra gabinete-Schotte a dispidí plaka na kos di bon bida, na biahamentu rònt mundu, na paga bodyguard, na kome yena barika den restorant i hotèl, tene fiesta i pasa bon ku amigu i kompinchinan.

Gerrit Schotte i su gabinete a duna Kòrsou un mal nòmber, pasobra e hendenan aki ta relashoná ku mafia. Tin transakshonnan finansiero dudoso i ineksplikabel ku a tuma lugá. Ta sirkulá rumornan ku ta trata aki di plakanan di droga. Kontinuamente tabata akusá e personanan aki di a laba plaka i ku a uza plaka shushi, plaka di malisia pa bini na poder i saka benefisio personal.

Rumannan, nos no por permití Kòrsou drei riba plaka shushi i plaka pisá ku maldat. Nos ningun no por hisa skouder i bisa kiko nos tin kunes, pasobra al final nos ta daña e ambiente en general na Kòrsou. Ta di e forma aki ta hasi Kòrsou peligroso i ku direpente ta surgi susesonan sumamente tristu manera por ehèmpel likidashon di sierto suidadanonan.

Rumannan den realidat, esakinan ta e kosnan mas tristu ku por sosodé ku gobernashon di un pais. Baho mundu ta peligroso i kòrda bon ku e tin su propio reglanan. Laga nos sòru pa tene nos gobernashon limpi i leu for di e tipo di situashonnan aki. Grandinan ta bisa: ‘Mihó koyon ku Dios pordon’!

Pueblo di Kòrsou mester ke siña i evitá pa kosnan bai robes manera tabata e kaso den algun pais bisiña. No laga propaganda i avisonan eksagerá ku awor direpente ta primintí bo Shelu i Tera kambia bo pensamentu. Vota konsiente, vota responsabel i ku bienestar di Kòrsou na promé lugá.

ERWIN RAPHAELA

Curaçao