RUMAN, BON dia. Shonnan sèn ta bai kaba! Mas ku nunka nos mester ta bon informá riba esun tópiko ku lo determiná tur loke e siguiente gobièrnu lo por hasi. Esaki ta e situashon di nos finansas:

- Maneho di finansas tabata asina fo’i òrdu, ku gobièrnu di reino mester a intervení. Awor a bin na kla ku e situashon ta muchu mas pió ku a kere!!

- Si no logra solushona e BURAKU finanshero aki, Kòrsou lo ta bankarota dentro di dos aña!

- Aqualectra no tin fondo di reserva pa invertí den mashinnan nobo, i debe Curoil kasi 90 mión florin.

- Ta primintí pa paga pa ‘skol pornada’, mientras esaki no ta presupuestá. Anto ta kièr a sigui ku ‘skol pornada’ sin tin moda pa paga??

- No tin plaka pa ekipá polis debidamente!

- No por fia plaka pa konstrukshon di hòspital!

- Ekonomia ta den problema; plaka no ta lora; komersiantenan ta desesperá; desempleo ta krese i mas famia ta den problema!

- Pa kolmo de los kolmos, dos mandatario ta defamá nos pais den eksterior ku konsekuensianan devastador pa nos turismo & kredibilidat!

Segun e atvertensia di Hulanda mester redusí e défisit, tantu di 2011, 2012 komo 2013. Ainda no a kumpli, pasobra e adaptashon di presupuesto no tabata korekto! Esaki ke men ku sierto gastunan ku ya gobièrnu ta komprometé pa hasi, no por keda realisá. Esaki lo tin konsekuensia pa kalidat di bida di esnan ku mester a risibí sierto benefisio di gobièrnu segun reglanan stipulá den lei! Atrobe ta e hòmber chiki ta sufri!

No ta Hulanda a hinka nos den problema! Ta inkompetensia di marka mayó a okashoná e desaster aki! Ta pesei un minister di finansas mester ta bon formá; preferiblemente na un nivel universitario pa e komprondé e kompleksidat dje materia. No por ta un hende ku no a kaba skol!

Awor ku e gobièrnu interino a deskubrí e desaster aki, nan lo mester bai formulá un plan kon pa solushoná e problema aki. Kon ta posibel ku a kuminsá 10-10-10 ku asina un bon situashon finansiero, pa aworaki nos ta sink bou di debenan asina kuantioso! MinPres interino a avisá ku henter komunidat lo mester yuda karga e gastunan pa pone nos finansas na òrdu a base di un diálogo nashonal.

Kalidat di e miembronan dje siguiente gobièrnu ta sumamente importante! Pasobra ta nan mester bai solushoná e problema aki!! P’esei mas ku nunka, mester di hende kapas riba e lista di bo eskoho ku por hasi e trabou, ku a demostrá ku e si por.

Nos ekonomia mester krese, pa generá entrada den kaha di gobièrnu. Un ekonomia kresiente ta krea mas empleo. Mas ganashi pa komersiante, mas hende ku trabou: mas entrada di belasting pa gobièrnu. Ta henter un kadena di evento ku ta relashoná ku otro. E ta eksigí un maneho ku vishon pa futuro serkano i mas aleu.

Tur esaki ta dependé pisá riba e kalidat di hende ku nos tin, ku por funshoná den un ekonomia ku mester ta kompetitivo. Mester di hende bon formá, tantu den nan edukashon eskolar, komo den nan vokashon, i abilidatnan laboral. Nan mester ta dispuesto di duna servisio efisiente ku un sonrisa i asumí responsabilidat propio. Tur esaki ta kosta plaka, loke aworaki ta skars! Hala mara ruman! Nos tur mester duna un man, pa huntu nos yuda salba pais!

Bai vota, i skohe hende kapas pa manehá pais i garantisá un bon futuro pa bo i bo yunan. I kòrda ku bo voto ta muchu mas balioso ku e persona ku ke kumpr’é!

Ku kordial saludo,

JOSEPH (‘JOPI’) HART

Curaçao