PARTIDONAN POLITIKO di turno a kometé fayonan grandi ku e pueblo di Kòrsou, deskuidando aspektonan sumamente importante di bida, anto tur esaki a forma e base pa un figura agresivo i peligroso manera Helmin Wiels ku ta malusá e situashon.

Den realidat apsolutamente nada útil e polítiko aki no tin di ofresé, sino únikamente gritamentu, hasimentu di boroto i agitashon dirigí kontra profeshonalnan, kontra ulandesnan europeo, kontra lidernan di iglesia, kontra komersiantenan kuerdo, kontra hende muhé den funshonnan importante, kontra periodistanan skèrpi i krítiko ku e kurashi pa presentá e bèrdat.

Formando parti di gobièrnu e tipo aki ku su partido no a logra nada sino solamente krea broyo, desòrdu i instabilidat.

Mas tristu ta e situashon kreá den kurason di yunan di Kòrsou, kargá ku rabia i kla pa hasi daño na otro. Kayanan di Kòrsou awendia ta kankan di outomobilistanan agresivo i sin toleransia pa kualkier deskuido humano kometé den tráfiko.

Tur anochi Helmin Wiels ta presentá na radio pa kanga saya i pone doudou. Un parti di e pueblo den nesesidat i ku poko formashon lamentablemente ta gosa i sinti su mes bon ku su pantominanan, siendo e pais kada dia ta bai mas patras.

Punda, Otrobanda i otro sentronan komersial na Kòrsou ta manera un ghost-town, no tin muchu moveshon. Kriminalidat ta na un nivel spantoso, pasobra esun ku por hòrta ta hòrta i tira atrako hasta riba hende grandi, inosente i vulnerabel pa forsa físiko brutu.

Un kultura di maldat i sin kompashon ta tumando over den Kòrsou. E ambiente den gobernashon ta unu sumamente bruá, eksplosivo i sin direkshon.

Kada dia e kantidat di suidadano ku miedu pa habri boka pa ekspresá prekupashon i desaprobashon ta oumentá.

Komersiante i invershonistanan konsientemente ta para na banda wak i no ta imbertí ni sikiera un depchi den nos ekonomia.

Siendo den gobièrnu Helmin Wiels tabata puramente un opstákulo grandi pa pas, e ta stroba trankilidat i desaroyo en general den Kòrsou.

Danki na Helmin Wiels ku awe komunidat di Kòrsou ta mal dividí, ku famianan bibando den un esfera di puru enemistat ku otro. Nos ta un pais den gara di rabia i agitashon.

Figuranan manera Wiels a yega di tin kaba na otro partinan di mundu i e daño ku nan a kousa ta grandi, tristu i ireparabel.

Ta p’esei e resultado di e elekshon di 19 di òktober, ta asina importante. E ta pa mira si e pueblo ta skohe pa e direkshon ku ta hiba nos den un konfrontashon agresivo frontal òf ta ban dal e buèlta pa pas, konfiansa i e buena boluntat pa traha den koperashon estrecho pa hiba e pais aki padilanti.

Komunidat di Kòrsou mester ke siña di fayonan humano kometé, siña di situashonnan tristu ku otro pueblonan di mundu a konosé i ku a keda kousá pa lidernan maligno i iresponsabel (malechornan grandi) ku a pone sanger drama.

ERWIN RAPHAELA

Curaçao