DIREPENTE A start hinter un tángana polítiko rondó di screening. Atrobe e tema screening! Ta kiko falta anto? Gerrit Schotte a bini den un rueda di prensa ku palabranan fuerte den direkshon di Helmin Wiels, splikando kon pueblo a vota pa e partidonan polítiko MAN, MFK i Pueblo Soberano, demostrando di tal forma ku pueblo lo ke pa e mesun gobièrnu bini na mando atrobe. Sinembargo Gerrit Schotte di un forma sabí a sigui mustra ku ta Wiels ke stroba e desaroyonan aktual. Ademas Gerrit Schotte a probechá hasta pa referí na retiro di señor Norman Girigorie, señora Lia Willems, señor Rene Rosalia i señor Lionel Jansen for di gobiernu-Schotte. Di un forma inteligente Gerrit Schotte a pinta Helmin Wiels komo un figura ku lo tin problemanan personal, ta egoséntriko et cetera.

Enfin, pa kòrta e bla, bla, bla largu, empaketá den tantu remarke, hopi komentario i akusashon, MFK, segun Gerrit Schotte, a disidí di hala atras for di e disponibilidat pa traha huntu ku MAN i Pueblo Soberano den un gobièrnu nobo.

Djis despues ata kompader Wiels ta duna deklarashon na Radio Hoyer 101.9 FM, kaminda Wiels a bisa enfátikamente ku e ke un gobièrnu limpi i ku e lo no pèrmití pa laga e gobièrnu aki tambe pasa den kasonan kompliká manera biaha pasá, kousá pa problemanan di integridat i falta di konfiansa. Helmin Wiels ademas a referí na un faltamentu di rèspèt ku lo a tuma lugá den sede di Pueblo Soberano riba e anochi di elekshon, dilanti di tur e simpatisantenan di su partido. Gerrit Schotte lo a bisa ku gabinete-Schotte # 2 lo ta na kaminda, siendo ta Wiels lo a gana elekshon.

Sinseramente bisá Helmin Wiels a toka e tema di ‘screening’ i a splika di un forma komprendibel, konvinsente i aseptabel ku MFK lo tin problema ku ‘screening’. Hasta e lider polítiko aki a papia di supuesto konstrukshonnan pa skapa kara di Gerrit Schotte, esta un asina yamá ‘rompkabinet’.

Ounke ku e resultadonan di elekshon enbèrdat a faboresé MFK, e partido ei su integrantenan, di akuerdo ku tur loke a keda publiká, tin un pasado ferfelu. Manera ta konosí, no muchu tempu pasá a sali tur sorto di publikashon riba Internèt, Facebook, via sms i propagandanan na televishon ku Gerrit Schotte lo ta metí den kantidat di bòmbòshi i bagamunderia ku ta tira un lus teribel riba e imágen di señor Schotte. Ophetivamente mirá un persona asina mal tachá, lo no mester tin e derechi di ta ni minister, ni presidente di Parlamento di Kòrsou. Helmin Wiels den e sentido aki tin tur rason di mundu, e asuntu di ‘screening’ aki no mester ta un punto di diskushon. A yega e momento pa Kòrsou bini na gobernantenan limpi, ku no ta metí den ningun klase di badabada i kosnan bergonsoso ku no por mira lus di dia. T’esei ta e punto stret ku mester tene duru na dje. Un punto di prekupashon sinembargo ta loke ta sosodiendo tras di kortina. Duars dor di tur loke ainda ta bini padilanti, nos tur sa ku tin interesnan pisá ta hungando un ròl, esta e plakanan imbertí den e partidonan polítiko aki.

Helmin Wiels awe ainda por sali padilanti grita i tuma un posishon tòf, pero ken ta e finansiadónan di kampaña? Esnan ku a sostené e partidonan aki ku plaka, anto te kon leu e hendenan aki lo ta dispuesto di soportá Wiels su ekspreshonnan krítiko ku ta tarda formashon di e gobièrnu ku nan ta deseá? Ta ei e weganan real ta bai konsentrá, pasobra ta ei final di kuenta lo pensa i krea tur sorto di konstrukshon sabí pa garantisá e interesnan ku ta den wega!!!! Pues un tiki sapatiámentu di parti di Helmin Wiels no ta bisa muchu kos.

ERWIN RAPHAELA

Curaçao