AKI TA papia Wan Pueblo, bendishon pa boso tur.

Rumannan mi tambe ke bòltu.

Ata Freddie mi kompader, mané di sinku urna a drenta,

a bula lanta kambia paña, kita pèchi hel benta un banda,

kima su flanè bèrdè, skonde tur karson djabou blou kla.

El a hupa pa Witte Boompjes, mi mes a bah’é den bògt pabou,

multitut di hende ta bòncha, fo’i tur parti di Kòrsou.

Ata awor pa su mala suèltu, e ta kòrá mané kref di Wacawa,

kabei di manteka mané Jan Klaassen, pero mas yu di Kòrsou ku Buchi Fil.

E ta mas buraché ku Chè di Jeta, mas ònbeskòp ku Djo Kachó.

Asina mes nan a yam’é makamba stinki, mand’é bai bèk serka Maxima.

Awèl pa falta di beter den su kurpa, e no a koba nan tur.

Ta ora el a manda un grandi, nan a lag’é na pas.

El a yega kas bou di su awa, topami den balkon sintá.

“Wan,” el a bisa ku lenga di solé, “bo ta bon den ingles, yudami ku esaki,

splikami su nifikashon. Un tèrsio na sede a bisami:

‘If you can’t beat them, join them’“

ROY EVERS

Curaçao