DIFERENTE BES mi ta risibí e pregunta ‘dikon mester keda duna atenshon na sklabitut i e konsekuensianan’? E pelíkula ‘Alleen maar nette mensen’ te e kontesta. Tanten ta propagandá, promové i stimulá un stereotipo di hende, i den e kaso aki di e hende muhé pretu o di koló, ta nesesario pa analisá i kontra arestá e konsekuensianan di kolonisashon, sklabitut i dominashon físiko i mental. Esaki ta e kaminda sano pa kuminsá ku e proseso di dekolonisashon di mente pa por yega na un fase satisfaktorio, determiná pa e komunidat, di e proseso di emansipashon. Esun ku segun hopi a kuminsá i terminá ku 1 di yüli 1863.

Tur komunidat ku e eksperensia kolonisashon i sklabitut, tantu esnan kolonisador komo esnan kolonisá, ta den e proseso di sanashon. Ta p’esei ta importante pa keda vigilá pa otro tiponan di rasismo i seksismo no drenta pa medio di kanalnan di komunikashon ku ta kontinuá siegamente ku opreshon i menospresio di otro ser humano.

Nos tin ku eduká tokante e historia berdadero, NOS historia berdadero, pa nos no tin miedo di ta yu di Kòrsou. Éf desendiente di Nigeria, òf Haiti òf Ulandes. Pasombra no tin nada robes ku ser nase komo yu di Kòrsou òf kualke otro nashon. Esaki no ta pone bo den e kategoria di ta mas ni ménos ku otro.

Por ehèmpel: Fransia a kontribuí ku su revolushon produsiendo e lema Igualdad, Fraternidad y Libertad i Haiti a mustra kon apliká esaki pa tur ser humano. Esaki ta djis un rasgo di kontribushonnan nashonal na e historia di humanidat. Kontribushonnan ku ta indiká ku nos mester duna honor na nos patria i respetá otro komo siudadano den e mesun patria i kontribushonnan ku ta mustra nos e importansia di rèspèt pa tur ser humano. No importante kolo, nashon, sekso o estilo di bista o komuniká.

E pelíkula ‘Alleen maar nette mensen’ ta uno mas den e tantísimo nan ku ta promové un imáhen eurosentriko di e hende di kolo sin niun análisis òf mensahe moral kritiko. Esta un imáhen stereotipo di e hende muhé di kolo. E no ta kontené niun moral antirasista, antidiskriminatorio o rèspèt pa hende muhé (estilo di bisti i komuniká no ta invitashon pa rasismo i seksismo!)

Athunto pa boso referensia e artíkulo ‘Media Control, Propaganda and Choice’ di J. Ostian, ku mi ta manda pa medio di e link aki. E artikulo athunto ta un analisis amplio di e pelikula.

http://www.space-invaders.eu/2012/10/media-control-propaganda-and-choice

Mi ta spera ku boso por tuma nota di e análisis kritiko aki i ku e por fungi komo instrumento pa ta kritiko kontra di tur tipo di re-kolonisashon.

LIANNE LEONORA

Curaçao